the mill of the ordure, excrement; the shit (worthless) mill

Díol spéise an logainm seo de bhunús Gaeilge a mhaireachtaint mar shráidainm i lár na cathrach. Mír choitianta dhímholta is ea an chaca “of the excrement” a thagann i gceist i roinnt logainmneacha. Sa Nua-Ghaeilge is ionann é, nach mór, agus na haidiachtaí crap, shit ‘gan aon mhaith’ sa Bhéarla (ghlaoití Séamas an Chaca a chaill Éire ar Shéamas II a chaill Cath na Bóinne, mar a luann Ó Donnabháin faoin logainm bf Táite an Chaca (#40116) i gCo. Mhuineacháin). Uaireanta bhraitheadh muintir na háite go raibh na logainmneacha seo mídheas, gur leasadar an t-ainm (cf. an logainm Béarla Leperstown a hathraíodh go Leopardstown): sampla cáiliúil is ea bf Cnoc an Chaca “the hill of the excrement” (#31782) i gContae Luimnigh, a d’aistrigh muintir na háite go Sugarhill le linn an athrú teangan go Béarla. Tá sampla againn sa Ghaeilge féin, leis: de réir gach dealraimh ba é Log an Chaca “the hollow of the excrement” bunfhoirm an logainm athmhínithe bf Log an Chatha “the hollow of the battle” (#45107) i gCo. Shligigh.